عصام سلطان يكتب: الحمل

- تفتكر فعلا هتحصل مواجهة بين الطرفين و هيسيل دم كتير يوم ٣٠ ..؟ 

- انا شخصيا لا أتوقع بس فيه ناس كتير وصحافة واعلام تتوقع ان ده ممكن يحصل ..

- طب افرض لاقدر الله ان ده حصل ، الوضع هيبقى ازاى ومين الطرف اللى هيحسمها السلطة ولا المعارضة ..؟

- اولا المواجهة الدائرة الآن ولغاية يوم ٣٠ مش بين السلطة والمعارضة ، المواجهة فيها أطراف من خارج الاتنين ، مثلا الاحزاب والقوى ذات المرجعية الاسلامية اللى خارج السلطة موجودة لانها مؤمنة بالدفاع عن ارادة واختيارالناس والتحاكم للصندوق على الرغم من انتقادهم لأداء مرسى وحكومته ، فى نفس الوقت الفلول والمعزولين سياسيا هما اللى بيقودو المشهد على الجانب الآخر ، ولو تلاحظ حتى الانقاذ اعلن مشاركته متأخر جدا ، وتصريحات الفلول واضحة ان هما حتى ضد الانقاذ ومش هيسمحو لحد منهم لا بتصدر المشهد ولا بجزء من االكحكة الموعودة ..

- طب وثانيا ..؟

- ثانيا خدها قاعدة ان اى مواجهة شعبية بين ناس عزل وناس معاهم سلاح فالحسم طبعا للناس العزل بلا مناقشة خصوصا لو كانو بيتحركو من منطلق عقيدة دينية ووطنية وقضيتهم واضحة والكلام ده من أيام الحملة الفرنسية اللى دحرها المصريين تحت قيادة العلماء الازهريين ..

- كدة غالبا هتحصل مواجهة ..

- اتمنى متحصلش بس لوحصلت هيتراجع كل اللى نازلين مع جبهة حملة السلاح الى بيوتهم للخلف در فى اول نص ساعة لان معظم دول محترمين و مش بتوع عنف وهيسيبو حملة السلاح والبلطجية والمسجلين لوحدهم يدخلو فى مواجهة مع السلميين ، وعايز اذكرك ان ده اللى حصل فى الثورة بالضبط ، لما تراجع ٩٠٪ من الناس اللى كانو فى ميدان مصطفى محمود بمجرد انهم شافو الاسلحة والبلطجية بعنيهم ، والطرف اللى انتصر هو الطرف اللى عنده قدرة على الثبات وتقديم شهداء ، والطرف اللى خسر هو الطرف اللى كان فاكر انه هيحسمها بالقوة زى ما كان بيعتقل ويعذب ويزور الانتخابات بالقوة لمدة٣٠ سنة ..

- طب وبعدين .. ؟

- وبعدين المراقبين والمحللين بيقولو ان ربما دى تكون الموجة التانية من الثورة اللى لا بد منها ، لان الموجة الاولى اسقطت مبارك بس وما اسقطتش مفاتيح المؤسسات اللى كانت بتاعته ومصنوعة على ايده ، وان الموجة التانية دى هى اللى هتطهر المؤسسات الخربانة بجد ..

- انا بصراحة مش عاجبنى حكاية المواجهات العنيفة دى وعايز حل ..

- الحل ان الناس السلميين من النهردة يعلنو عن مكان محدد لنزولهم ويعملو لنفسهم بوابات وتفتيش زى ما كنا بنعمل فى ميدان التحرير وميسمحوش للسلاح بالدخول ويتظاهرو ويعتصمو ويستمرو ايام واسابيع لغاية ميقنعو ملايين بصحة وجهة نظرهم وينزلوهم من بيوتهم بالاقناع زى ما عملنا بالضبط فى ثورة يناير وغير كده تبقى مش ثورة دى تبقى حمل كاذب وهيتفضح ادام الناس والعالم ، وفى نفس الوقت يسيبو حملة السلاح لوحدهم ويتم التعامل معاهم ومواجهتهم عن طريق الدولة مش التجمعات الشعبية لأن الدولة هى المسئولة عن حماية امن الناس والمصالح الحكومية والمقرات الادارية والتعامل يكون فى حدود القانون واى تزيد او تجاوز يتم محاسبة المتجاوز ..

- موضوع الحمل الكاذب ده عايز تفكير ..

- مش تفكير بس .. لازم تحليل كمان ..