عصام سلطان يكتب : فين المشكلة ..؟

- الحمد لله ربنا أكرمنا وداخلين على العشرين مليون توقيع وإن شاء الله أتوقع ان احنا هنعدى التلاتين مليون قبل آخر الشهر وزى مانت شايف النظام مرعوب وحرق المقر بتاعنا امبارح ..
- النيابة حددت مين اللى حرق ..؟
- لا بس الموضوع واضح جدا ومش محتاج نيابة ولا فقاقة .. المستهدف هو حرق الاستمارات وتخويفنا ..
- بس فى كلام ان انتو اللى حرقتوه فى اطار ترتيباتكم وان فى حرائق و عنف وربما اغتيالات اليومين الجايين دول ..
- الكلام ده غير صحيح ومقصود بيه تشويهنا وماينفعش نسبق تحقيقات النيابة ..! وبعدين سبق وقلتلك الفلول هما بتوع العنف لان ليهم سيطرة على البلطجية والمسجلين انما احنا سلميين ..
- معنى كده ان انتو لو كنتو دخلتو انتخابات مجلس النواب الموقوفة كنتم هتخدو ٧٥٪ لأن عدد اللى بيروح يصوت أقل من٣٠ مليون وانتو وصلتو ل٢٠ مليون ..
- طبعا دى مش عايزة كلام .. وربما أكثر ..
- طب ليه طعنتوا على قرار مرسى اللى دعا للانتخابات وفرحتو جدا بوقفها ..؟
- لأن الانتخابات فيها زيت وسكر وعزف على الوتر الدينى والشريعة والذى منه والاسلاميين بيضحكو على الناس بالطريقة دى وبيفوزو فيها ..
- بس واضح ان الناس فاقت ومعدش بيدخل عليها الكلام ده بدليل انها وقعتلكو ..
- مش اوى كدة وبعدين متطمنش للناس ممكن تلاقيهم الصبح اتسطلو فى دماغهم وصوتو للإسلاميين تانى ..
- ولما وقعو على استمارات تمرد كانو فايقين ومش مسطولين ولا حاجة ..؟
- طبعا ..
- معنى كلامك ان المشكلة فى الناس لانهم ساعات بيفهمو وساعات بيتسطلو ومحدش عارف دا بيحصل امتى ودا بيحصل امتى ؟
- بالضبط كده ..
- طب والحل .. ؟
- الحل ان احنا بعد يوم تلاتين اللى جاى هنعمل فترة انتقالية طويلة نعلم فيها الناس الديمقراطية الحقيقية وازاى يفضلو على راى واحد ميتغيروش ابدا ونوعى الناس بأخطار الحكم الدينى علشان ميحصلش عندنا زى ماحصل فى تركيا ، صحيح هما انجزو اقتصاديا ، بس بردو اسلاميين مستخبيين .. واثناء الفترة الانتقالية لازم نظبط دستور كويس يحظر كل الاشكال والمظاهر السياسية المرتبطة بالدين ..
- المجلس العسكرى طول الفترة الانتقالية سنة ونص بدل ٦ شهور وكان عايز يطولها اكتر ومعرفش .. و عمر سليمان كان شايف ان الشعب المصرى مينفعوش الديمقراطية اصلا .. ودستور تركيا بيحظر كل ماله علاقة بالدين من سنة ١٩٢٤ .. وبردو الاسلاميين وصلو للحكم هناك وهنا .. هتعمل إيه .. عندك حل تانى ..؟
- كل الخيارات مفتوحة .. !
- بالعكس .. واضح ان كل الخيارات بطريقة التفكير دى مسدودة مش مفتوحة ولا حاجة ..
- مش هذيع سر لو قلتلك ان هو دا التحدى الحقيقى اللى بيواجهنا واحنا كنا عملين ورشة عمل لمناقشة الموضوع دا وموصلناش لحاجة ، خصوصا ان الامريكان الزبالة خدعونا وقالولنا فى الاول احنا معاكو وبعدين خلعو مننا بحجة ان الشارع مش معانا واحنا مش عارفين نحشد عدد كبير وبصراحة هو دا اللى خلانا نتحالف مع الفلول ، بس الفلول بيشاركو بشروطهم وبلطجيتهم وأسلحتهم وبعدين العملية بتقلب بعنف والمصريين مش بيحبو العنف وبيتعاطفو مع الطرف السلمى علطول ، زى يوم موقعة الجمل بالضبط ، و هو دا اللى نجح الثورة ، بصراحة احنا بندور فى الدايرة دى بقالنا سنة بالضبط وكل مانقول الموضوع هيخلص المرة الجاية ولا بيخلص ولا حاجة .. احنا مش عارفين المشكلة فين بالضبط .. فى الفلول ولا فى الامريكان ولا فى الشعب الى مش عارف يعنى ايه ديمقراطية .. ولا فى الجيش اللى رفض يستجيب لينا وينزل ..
- انت مش شايف ان المشكلة ممكن تكون فى حد تانى غير دول ..؟
- لأ ..
- شد حيلك ولما تعرف المشكلة فين وعند مين ياريت تبلغنى ..