روى الطالب "عمر خالد" (طالب بهندسة عين شمس) شهادته عما حدث اليوم بجامعة عين شمس قائلا:
"شهادتى عما حدث اليوم فى جامعة عين شمس مرفق "فديو " مع الشهادة :
أنا كنت موجود من أول اليوم ﻷخره و هحكى اللى شفته بعينى فقط
تجمعنا نحن -طلاب ضد الانقلاب - جامعة عين شمس - على الساعة 11:30 أمام باب الحرم الرئيسى لجامعة عين شمس عشان ندخل بمسيرة داخل الحرم تنديدا بالانقلاب و حكم العسكر و الضبطية
بدأنا المسيرة و دخلنا باب الجامعة دون مشاكل و توجهنا لقصر الزعفران داخل الحرم
وسط المسيرة ظهر حوالى 10 مؤيدين للسيسى أمامنا بيهتفوا للسيسى و مع الوقت عددهم زاد و بدأ يتجمع بلطجية حقوق (نيو فيجن) و احنا عارفينهم من السنة اللى فاتت و بقوا يشتمونا و يشتموا محمد مرسى -مع اننا اصلا مش نازلين لمرسى ولا بنهتفله -
بدأنا نقلهم طب اقفوا على جنب اهتفوا براحتكم عشان نكمل المسيرة مرضيوش
فبقينا نمشى و هما ماشيين قدامنا باصينلنا و بيهتفوا ضدنا
سيبناهم قدامنا و لفينا رايحين لقصر الزعفرانة
جريو سبقونا على القصر و وقفوا على السلالم يهتفوا ضدنا و ضد الإخوان و ضد مرسى -مع اننا مالناش علاقة بالكلام ده-
سيبناهم لتانى مرة و مشينا من عند القصر فى اتجاهنا للباب الرئيسى عشان نختم المسيرة
لفوا و جم وقفوا قدامنا جنب حقوق و بيمنعونا اننا نكمل المسيرة نحو الباب
بدأ أسلوبهم يتغير و استفزازات و سب دين و شتايم قبيحة و احنا مش عايزين نرد مع ان عددنا ضعف عددهم و كان معانا بنات فبدأنا نمشى البنات من ورا
بقينا احنا متجهين للباب عايزين نمشى و هما قدامنا ضهرهم للباب منعينا من الخروج
بدأت الاعتدائات تزيد و ناس منهم قلعت الأحزمة و بدأت اشتباكات خفيفة
لحد اما واحد منهم ولع شمروخ و دخل يضرب بيه الناس و رجع الناس مسافى كبيرة
بدأت حدة الاشتباكات تزيد و الواد اتضرب و الشمروخ وقع
بدأ اشتباكات بالطوب من الطرفين بعد اما الشمروخ اتحدف علينا
اشتباكات الطوب فضلت مستمرة لحد ما جرينا عليهم و خرجناهم برا باب الجامعة و قفلنا الباب علينا
بدأوا يحدفوا طوب من برا علينا و طبعا الطوب بيترد عليهم
فضلنا كدا شوية لحد اما اتقال ان الشرطة جاية
فانسحبنا تدريجيا وسط الطلاب و خرج اغلبنا من باب حقوق الجانبى
اتطمنا على الناس انهم خرجوا
سمعت بعديها ان ابواب الجامعة اتقفلت و الشرطة جت
ملحوظات :
هما اللى قعدوا يستفزوا فينا و شتايم و حركات و ضرب و احنا ماسكين نفسنا مع اننا اكتر
اللى بيحركهم هما بلطجية حقوق (نيو فيجن) اللى اتضربوا السنة اللى فاتت و اتطردوا من الكلية و الجامعة قفلت اسبوعين
بتوع حقوق دول احنا عارفين اشكالهم من السنة اللى فاتت و منهم الواد نوبى
مظهرش سلاح ابيض او مولوتوف او خرطوش الحمد لله (حسب ما رأيت)
كان كله اشتباكات بالطوب
الخلاصة :
مسيرة لطلاب ضد الانقلاب حاول مؤيدى السيسى و بعض البلطجية من التعدى عليها
فطردهم الطلاب من الجامعة بعد اشتباكات بالطوب"
0 التعليقات:
Post a Comment