ربنا هينصرنا لما نكون مسلمين بحق وحقيق!!
اللي هو إزاي يعني؟!
أولاً: محدش يعرف إيه معنى النصر أساساً ... القرآن اعتبر إن مقتل أصحاب الأخدود وحرقهم نصر لهم ... وصلح الحديبية اللي سيدنا عمر بن الخطاب اعتبره معاهدة "ذليلة" اعتبره القرآن نصر !
ثانياً: يعني إيه مسلمين بحق وحقيق دي ... يعني نعمل إيه؟! ... نصلي كتير مثلاً ولا نهذب أخلاقنا ... طب ربنا بينصر الناس التانية ليه؟! ... لا هم مسلمين ولا يحزنون ... وبيشربوا خمرة ومبيصلوش ... ولا علشان بيشتغلوا كويس؟! هو الموضوع بالوراثة مثلاً؟! ... اللي يتولد مسلم يبقى ربنا وعده بالنصر ... واللي يتولد مش مسلم يبقى المسلم لازم ينتصر عليه في النهاية؟! ... أبناء الله وأحباؤه إحنا يعني ولا إيه؟!
ثالثاً: افرض إن إحنا مسلمين ... بس ظلمة ... زي السيسي كدة ... ورايحين نحارب كفار ... بس مش ظلمة وإحنا اللي رايحين نفتري عليهم ... يبقى ربنا ينصرنا إحنا علشان إحنا مسلمين؟! ... واسطة هي؟!! ... إزاي يعني؟!
رابعاً: القصة قصة حق وباطل ... مش قصة مسلمين ومش مسلمين ... هو إنت فاكر لما صحفي أجنبي يعتقلوه في بلدك وبلاده تقلب الدنيا علشان تطلعه ... إنت فاكر إن دي مش حرب ... دي حرب بين الناس اللي مش مسلمين بس بيدافعوا عن الحق ... والناس المسلمين بس بيدافعوا عن الباطل ... وأنا باكون سعيد جداً لما ننهزم وننذل ونضطر نخرج الصحفي ده غصباً عنا
خامساً: ناس عندها السيسي ومحمد ابراهيم ... سفاحين وولاد ستين كلب ... قتلوا كام ألف في كام ساعة زمن بدون حساب ... في حين إن فيه دول ملحدة المسئولين فيها بيدخلوا السجون لو سرقوا دولار واحد ... وعندك حرية تعتنق أي دين وتمارس عباداتك كما تشاء ... في حين إن هنا لو بنت قررت تمشي من غير حجاب بيدخلوها النار ... ولو مشيت بحجاب دلوقتي بيعتقلوها بتهمة الإرهاب ... مين اللي على الحق ومين اللي على الباطل؟!
سادساً: أعتقد إن هدف الإسلام هو إقامة العدل في الأرض، وتعريف الناس بالله، فيه دول غير مسلمة فيها العدل موجود ... وعندهم حرية إنهم يقرأوا عن أي دين دون مشاكل ... مفيش حائل يعني بين الإنسان وبين الإسلام ... لكن في بلادنا ... لا فيه عدل ولا فيه حرية ولا فيه حد هيسمح لك تعرف ربنا كويس ... إذا كان بيقولوا على السيسي نبي !
---
ربنا هينصرنا لما نشتغل كويس ... النصر مش للمأنتخين !
0 التعليقات:
Post a Comment