زيادة الأسعار تلتهم علاوة أصحاب المعاشات

                                       اصحاب المعاشات - ارشيفية

• خلف: «90 جنيه هتعمل إيه»

• طه: «البيت محتاج 150 جنيها يوميا»

أمسك خلف يوسف، بمعاشه بعد أن حصل عليه من مكتب التأمينات بمنطقة الألفى، وأخذ يقلبه يمينا ويسارا، وهو يقول «90 جنيه زيادة على المعاش بس، ودى هتكفى إيه ولا إيه».

بالأمس حصل خلف على معاشه مضافا إليه، العلاوة الاجتماعية المقرر لأصحاب المعاشات بقيمة 10% على إجمالى المعاش، «كنت باخد 910 جنيه، وبعد الزيادة بقيت 1000 جنيه، ودى زيادة ما تكفيش، زيادة سعر البنزين والمواصلات والأكل والشرب».

وأقر رئيس الجمهورية، عبدالفتاح السيسى، علاوة اجتماعية لأصحاب المعاشات تقدر بـ 10 % من إجمالى المعاش، تصرف بدون حد أدنى لهم، منذ أول يوليو، فضلا عن علاوة أخرى أقرت فى بداية هذا العام بنفس النسبة ولكن بحد أدنى 50 جنيها.

لدى يوسف 3 أولاد، جميعهم فى مراحل التعليم المختلفة، «واحد فى الجامعة والتانى فى ثانوى والثالث فى الإعدادى، يعنى مفيش حد بيساعدني»، بجانب مصاريف الأولاد يدفع يوسف 300 جنيه إيجارا للشقة التى يعيش فيها بمنطقة منشأة ناصر.

يرى يوسف أن الزيادة التى أقرت على المعاش لا تكفى ما يعانيه هو وأسرته ويقول «يعنى رغيف العيش بقى بـ50 قرش، والألف جنيه هتكفى إيه بقى».

لا يختلف الحال بالنسبة لإسماعيل طه، مدرس على المعاش، فرغم أنه يحصل على معاش يقدر بنحو 2250 جنيها، إلا أنه يرى أن هذا المعاش بالعلاوة التى أقرت عليه، لا تكفى.

ويضيف طه، «أقل حد أدنى لأى بيت مصرى هو 150 جنيها فى اليوم، وده يا دوب يكفى المصاريف».

بحسب طه فإن «صاحب المعاش فى البلد متبهدل جدا، المفروض أول لما أطلع معاش يكرمونى، عايز ألاقى حد يساعدنى على الحياة بعدها، عايز كارت مواصلات زى بتوع بره أركب فيه ببلاش وعلاج، ودى حاجة قليلة علينا».

حالة على محمود، صنايعى أحذية على المعاش، أقل بكثير حيث يحصل على معاش 400 جنيه وبالتالى حصل على علاوة تقدر بـ40 جنيه، «يعنى يا دوب حق علبتين سجاير مارلبورو»، يضحك محمود وهو يخرج من مكتب التأمينات بعد أن حصل على معاشه.

عمل محمود لسنوات طويلة كصانع أحذية فى إحدى الورش، لكنه فوجئ بعد خروجه على المعاش أن سنوات التأمين الخاصة به لم تعطه سوى 300 جنيه، وتدرجت بالعلاوات حتى وصلت لـ400 جنيه.

الشروق